umu amakuru- Minisitiri Uwizeyimana Evode yise abanyamakuru imbere y’abadepite ‘imihirimbiri’. | Umusingi

Minisitiri Uwizeyimana Evode yise abanyamakuru imbere y’abadepite ‘imihirimbiri’.

Views:
324

Ijambo ribabaje Umunyamabanga wa Leta Ushinzwe Itegeko Nshinga n’andi mategeko, Uwizeyimana Evode, yise abanyamakuru ‘Imihirimbiri’, ubwo yari mu Nteko Ishinga Amategeko haganirwa ku ngingo ihana icyaha cyo gusebanya.

Kuri uyu wa Kabiri tariki ya 28 Ugushyingo 2017, Abanyamakuru bari bahawe ubutumire bwo gukurikirana imirimo ya Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, gusa mu buryo butari bumenyerewe umunyamakuru winjiraga yasabwaga kuba aretse gufata amajwi.

Yahitaga abwirwa ko hari inkuru zakozwe kuri uyu wa Mbere tariki ya 27 Ugushyingo 2017, zitabanyuze ahanini ku buryo ibitekerezo baba batanze bishyirwa hanze.

Abanyamakuru bari bitabiriye ibi biganiro bavuze ko Uwizeyimana yumvikanye avuga ko hari ibibazo mu gushinga ibinyamakuru kuko ahandi umuntu aba afite ingengo y’imari ku buryo usebeje umuntu wabona indishyi utanga, “atari nk’ibi byacu.’

Muri izo mvugo Uwizeyimana yakoreshaga abanyamakuru babujijwe gufata amajwi, ni naho yageze avuga ko hari ibinyamakuru bitazwi bipfa kwandika ibyo bibonye, n’ababikoraho badasobanutse, avuga ko “harimo abo ureba ugasanga ari abantu b’imihirimbiri”.

Iri jambo ‘imihirimbiri’ ryababaje abanyamakuru benshi, ku buryo bifashishije imbuga nkoranyambaga na hashtag #JeSuisUmuhirimbiri, baryinubira mu gihe umwuga bakora bawufata nk’uwiyubashye.

Evode Uwizeyimana wambaye amarinete (Internet)

Ivan Mugisha‏ ukorera The EastAfrican yagize ati “Birababaje kubona Minisitiri, mu kiganiro n’abagize Inteko Ishinga Amategeko kireba ku gusebanya, agereranya abanyamakuru bo mu Rwanda n’Imihirimbiri. Ese ubu si ugusebanya ubwabyo?”

Umunyamabanga Nshingwabikorwa w’Umuryango Nyarwanda w’Abanyamakuru, ARJ, Muganwa Gonzague na we wari mu nteko we yagize ati “#JeSuisUmuhirimbiri Itangazamakuru ni umwuga wubashywe. Mwitwibasira.”

Edmund Kagire na we wo muri The East African, yavuze ko biteye ikimwaro kuba Minisitiri yakoresha amagambo nk’ayo ku banyamakuru, bikaba bitumvikana ukuntu ari gusobanura itegeko “rihana gusebanya yarangiza akabikora asebanya.”

Mu kiganiro kuri uyu wa Kabiri kandi, Uwizeyimana yaganiriraga n’abadepite ku mushinga w’itegeko riteganya ibyaha n’ibihano mu Rwanda, ku ngingo ya 169 ivuga ko umuntu uhamwe n’icyaha cyo gusebanya yitwaje ubwisanzure bwo kugaragaza ibitekerezo, ahanishwa igifungo kitari munsi y’imyaka ibiri ariko kitarenze imyaka itatu n’ihazabu itari munsi ya 3 000 000Frw ariko itarenze 5 000 000 Frw cyangwa kimwe gusa muri ibyo bihano.

Mu biganiro kuri iyi ngingo ikunze kwitwa ko ireba cyane Itangazamakuru, Gonzague Muganwa, yavuze ko niramuka yemejwe izaba ibangamiye ubwisanzure bw’itangazamakuru mu Rwanda, kuko “amakosa nk’aya atakabaye ahanwa mu rwego rwo gufunga umuntu ahubwo yakabaye mu mategeko mbonezamubano.”

Yagereranyije kurega abanyamakuru badafite ubwishyu no kurumwa n’imbwa itagira nyirayo

Minisitiri Uwizeyimana yatanze urugero ku binyamakuru bikomeye ku Isi bikora nk’inganda ku buryo iki cyaha kitahanwa n’indishyi gusa, kuko bashobora kuvuga ngo ‘tugiye gusenya umuyobozi runaka, bazaduca miliyoni imwe y’amayero, aha tuzakuramo miliyoni eshanu, inyungu ni enye.”

Yagize ati “Ese umuntu agusebeje cyangwa akakwandagaza, ukajya kumurega mu manza mbonezamubano ati mpa avoka, ni ukuvuga ngo kwa kubazwa inshingano wenda ntikukikuriho kwabaye ukw’ikinyamakuru ukorera, kuko ni ikinyamakuru kijya kuregwa.”

“Ese kwa kubazwa ibyo ukora biba bigihari? Ese noneho ngiye kukurega, ndagutsinze, ko nzi ko ukennye urampa iki? Byaba se nko kuribwa n’imbwa itagira nyirayo, ikirukira mu gihuru wowe ukajya kwa muganga?”

Gusa ngo mu gihe umunyamakuru yavuze ikintu ari ukuri, ngo nta kibazo gikwiye kubaho kuko “ntabwo ari umunyamakuru utuma ikintu kibaho, we icyo akora ni ukugitangaza.”

Umucamanza kandi ni we uzajya aba afite inshingano zo kwemeza niba ikintu cyakozwe mu nyungu rusange, atanga urugero rw’umunyamakuru aramutse amenye umugambi wo kunyereza umusoro akandika ababirimo maze ukaburizwamo.

Uyu mushinga w’itegeko uteganya ko iyo ibintu byatangajwe ari ukuri cyangwa bikozwe mu nyungu rusange, bidashobora guhanwa nko gusebanya.

Si ubwa mbere Minisitiri Uwizeyimana akoresha imvugo zitavuzweho rumwe, kuko no mu nama y’igihugu y’Umushyikirano yabaye mu Ukuboza umwaka ushize, yabwiye Musenyeri wa Diyosezi ya Byumba, Sylverien Nzakamwita ko impungenge yagaragazaga ku bibazo biri mu muryango nyarwanda nta shingiro kuko “nta rugo agira.”Abanyamakuru ku mbuga nkoranyambaga bahuriraho bose iri jambo yabise ryabarakaje ndetse bamwe batangira kwibaza niba ari Leta yamutumye cyangwa yabyibwirije ndetse abandi batangira gucika intege kandi buri gihe Leta ibita abafatanya bikorwa aho usanga bababwira bati mudufashe gahunda zacu zigere ku baturage bose none bakaba biswe umuhirimbiri birababaje nkuko babivuga.

 

 

About author

Related Articles

Leave a reply

Your email address will not be published. Required fields are marked *