umu amakuru- Umunyamakuru Besabesa Etienne wigeze gufungirwa mu Burundi mu 2015 yahunze igihugu | Umusingi

Umunyamakuru Besabesa Etienne wigeze gufungirwa mu Burundi mu 2015 yahunze igihugu

Views:
453

Umunyamakuru Besabesa Etienne wakoreye Flash Fm yafashe iy’ubuhungiro atangaza ko yahunze ku mpamvu zifitanye isano n’umwuga we mu gihe ubuyobozi bwa Flash Fm bwemeza ko yari yarirukanwe muri Nyakanga ndetse abandi bakemeza ko yishakira uko yahabwa ubuhungiro akajya muri Canada yitwaje ko ubuzima bwe buri mu kaga.

Mu kiganiro yahaye rumwe mu rubuga rukorera kuri internet, umunyamakuru Besabesa yabajijwe impamvu yafashe icyemezo cyo guhunga igihugu, asubiza ko impamvu nyamukuru ari ibibazo yahuye nabyo mu mwuga we bishobora gushyira ubuzima bwe mu kaga.

Yagize ati: “Impamvu nyamukuru cyangwa se icyanteye kuba nahunga igihugu uyu munsi nkaba ndi mu buhungiro,..impamvu nta yindi n’ibibazo nahuye nabyo mu mwuga wanjye nari nsanzwe nkora w’itangazamakuru..ibyo bibazo rero mbona ko bishobora gushyira ubuzima bwanjye mu kaga, mpitamo gukuramo akanjye karenge njya mu buhungiro kugirango ntagirirwa nabi cyangwa ntazamburwa ubuzima bwanjye.”

Yabajijwe inkuru nyamukuru yaba yarakoze ikamuzanira ibibazo ku buryo yafata inzira y’ubuhungiro, avuga ko ari inkuru y’amazu y’abaturage asaga 20 mu Murenge wa Gisozi yasenywe kuwa 10 Kanama 2017, avuga ko babahamagaye nk’abanyamakuru bakajya gukurikirana uko igikorwa kigenda, ariko ngo mu kuhagera bakaba barabwiwe ko izo nzu zisenywa mu buryo bunyuranyije n’amategeko.

Avuga ko yabajije abatuye aho, bakamubwira uko babibonye ndetse bagaragaza ko batumva uko abayobozi barebera inzu zubakwa zamara kuzura bakaza bakazisenya, ngo bavuga ko byose biterwa na ruswa. Uyu rero avuga ko yakoze inkuru ariko agahamagarwa agasabwa gukosora iyo nkuru ndetse akajya aterwa ubwoba n’abayobozi.

Bwiza.com yagerageje kuvugana n’ubuyobozi bwa Flash Fm Besabesa avuga ko yakoreraga, maze umuyobozi w’iyi Radio, Louis Kamanzi, ku murongo wa telephone, ayitangariza ko uyu munyamakuru atari akiri umunyamakuru wa Flash Fm kuva muri Nyakanga muri uyu mwaka. Abajijwe ku nkuru Besabesa avuga ko yamuzaniye ibibazo agafata icyemezo cyo guhunga  abazwa niba ntayo bari bamutumyemo, yasubije ko iyo nkuru ntayo bazi

Ku rundi ruhande ariko, amakuru yizewe agera kuri Bwiza.com ava mu bantu bazi neza Besabesa Etienne barimo n’abanyamakuru bagenzi be, aravuga ko Besabesa ashobora kuba yahunze ku mpamvu ze kuko ngo koko nk’uko umuyobozi wa Flash yabivuze, yari amaze iminsi nta kazi afite ndetse atunzwe n’amafaranga yo koroshya urugendo abanyamakuru bahabwa n’ibigo biba byabatumiye iyo bagiye kubikoraho inkuru.

Aya makuru rero akaba akomeza avuga ko kuri ubu Besabesa ari mu gihugu cya Uganda, aho ateganya kuzava ajya muri Afurika y’Epfo, akazahava akomereza muri Canada.

Dusubiye inyuma gato, uyu munyamakuru Besabesa Etienne hari igihe yigeze gufatirwa mu gihugu cy’u Burundi n’inzego z’umutekano zaho igihe muri iki gihugu byari bikomeye nyuma yo kugerageza guhirika ubutegetsi mu 2015.

Icyo gihe, Aimable Rwigamba, umuyobozi wa Radio Izuba  nayo yakoreraga, yavuze ko bari batumye Besabesa Etienne inkuru mu Murenge wa Gahara ho mu Karere ka Kirehe, ariko uyu akaza kwambuka akajya mu Burundi agafatirwayo. Hari amakuru rero yemeza ko icyo gihe yambuka I Burundi yari yanasinze hagakekwa ko isindwe ari ryo ryatumye yinjira I Burundi icyo gihe atitaye ku ngaruka byari kumugiraho.

 

About author

Related Articles

Leave a reply

Your email address will not be published. Required fields are marked *