umu amakuru- Imiti y‘asaga miliyari yarangirije igihe mu bubiko bwa RBC | Umusingi

Imiti y‘asaga miliyari yarangirije igihe mu bubiko bwa RBC

Views:
42

Imiti ifite agaciro k’amafaranga y’u Rwanda arenga miliyari yarangirije igihe iri mu bubiko bw’Ikigo cy’igohugu gishinzwe ubuzima (RBC) ishami rishinzwe imiti (MPPD) mu mwaka ushize wa 2015/2016.

Iyi miti irimo icyiciro cy’itangwa n’abaterankunga batandukanye n’igice cy’iyaguzwe na Leta y’u Rwanda.

Muri uwo mwaka, imiti yaguzwe na Leta y’u Rwanda yarangirije igihe mu bubiko ifite agaciro ka miliyoni 156 Frw naho iyatanzwe n’abaterankunga ni iya miliyoni 986 Frw.

Ubwo ubuyobozi bwa RBC bwitabaga Komisiyo y’Inteko Ishinga Amategeko ishinzwe gukurikirana ikoresha ry’umutungo wa Leta (PAC) kuri uyu wa Kane, bwasabwe gusobanura iki gihombokigaruka buri mwaka muri raporo y’Umugenzuzi mukuru w’imari ya leta.

Umuyobozi Mukuru wa RBC, Condo Jeanine, yavuze ko ku rwego rw’igihugu babashije kugabanya ikigero cy’imiti yangirikiraga mu bubiko ariko ku ruhande rw’abaterankunga ho ahubwo biriyongera.

Yavuze ko abaterankunga benshi batanga imiti y’indwara zikomeye nk’ubwandu bw’agakoko gatera SIDA n’igituntu; iyo bageneraga u Rwanda ifasha ababyeyi babana n’ubwandu kutanduza abana batwite ariko imibare yabwo yaragabanutse.

 

Yagize ati “Ikibazo cy’imiti irangiriza igihe mu bubiko tumaze iminsi tugikurikirana. Iy’abaterankunga nk’uko mubibona niyo igenda yiyongera .Bishobora guterwa n’ibintu byinshi, nko muri 2010 ubwandu buva ku mubyeyi bujya ku mwana twari dufite 10 % ariko ubu tugeze kuri 1 %. Uko abarwara indwara bagenda bagabanuka bigenda bigira ingaruka ku miti irangiriza igihe mu bubiko kuko uko twateganyije tugendeye ku myaka yabanje bigenda bihinduka.”

Condo yanavuze ko hari imiti bagura bikaza kugaragara ko itagishoboye guhangana n’indwara cyangwa igacibwa ku rwego mpuzamahanga kubera ingaruka zayo ku buzima bigatuma irangiriza igihe mu bubiko kuko itagikoreshwa.

Yavuze ko hari kurebwa uko imiti idafite ikibazo u Rwanda rutazayikoresha, rwajya ruyiha ibindi bihugu biyikeneye.

Yagize “Twatangiye imibanire myiza n’abo muri Uganda, Kenya, Burundi ku buryo tubafasha.Turabiteganya kugira ngo imiti itazatwangirikiraho.”

RBC yanavuze ko ikorana n’amavuriro yigenga na za farumasi ikabaha imiti itazakoreshwa, n’ibitaro by’uturere bifite myinshi bigaha ibindi.

Ukurikije imiti igurwa, iyangirikira mu bubiko igeze kuri 0.7 % ariko RBC ivuga ko ishaka ko bigera kuri 0 %.

Depite Karenzi Theoneste yavuze ko bidakwiriye ko RBC igura imiti myinshi kugeza aho irangirije igihe cyangwa iherewe abandi, ahubwo ngo hakenewe gupanga kare hakagurwa izakenerwa.

Yagize ati “Kuki mudategura hakiri kare ibyo muzakenera ? Twirinde kugura imiti kandi itazakenerwa. Nk’ubu hari ubwo mushobora kuba mureba mukabona hari imiti mutazakenera. Nubwo mufite iyo gahunda yo kuba mwatanga imiti ku bandi ariko amafaranga aba yaratanzwe kandi yakabaye akora ibindi bikorwa.”

Raporo y’Umugenzuzi Mukuru w’Imari ya Leta igaragaza ko mu 2012/2013 imiti RBC yaguze ikarangiriza igihe mu bubiko ifite agaciro ka miliyoni 156 Frw; mu 2013/2014 hangiritse iya miliyoni 158 Frw; mu 2014/2015 hangirika iya miliyoni 270 Frw naho mu wa 2015/2016 hangirika iya miliyoni 429 Frw.

Imiti itangwa n’abaterankunga mu 2012/2013 hangiritse ifite agaciro ka miliyoni 710 Frw; mu 2013/2014 hangirika iya miliyoni 509 Frw; mu 2014/2015 hangirika iya miliyoni 693 Frw naho mu mwaka wa 2015/2016 hangirika iya miliyoni 758 Frw.

 

 

About author

Related Articles

Leave a reply

Your email address will not be published. Required fields are marked *